I varai vûts cuatri-cinc ains cuant che mê mari, ogni domenie, mi menave cun sè a messe e gjespui a Madone, e jô i jescivi dai bancs par cjalâ miôr ce ch’al faseve el plevan lassù daûr dal altâr. Dopo, a cjase, in tun gjornâl i fasevi une buse tal mieç, tant che mi passàs el cjâf, e cun chel gjornâl mieç denant e mieç daûr come un piviâl, cul seglâr par altâr, mi metevi a dî messe e gjespui cun tune file di «dominus vobiscum». Alore in famee e an tacât a dî: «chel frut al deventarà predi di sigûr, forsit ancje vescul o magari pape, dato che cussì adore al à tante vocazion».

Une dì el plevan al ven in visite lassù di Sefe e sintint les femines di cjase a contâ de mee disposizion si complimente e mi domande ce ch’i sai preâ, alore jo avanti cun: «Avemarie, Patarnostri, Gloriapatri, Angjeledei» e vie indenant. «Brâf, brâf - al diseve el plevan – propit bravo, ce brâf frutìn. Sint po ninìn, satu ancje cjantâ ? Cjantimi alc di ce che tu sâs.» Cussì i tachi: «Tintine tintone cui balial lassù, son predis son sioris si tratin dal tu», «vonde vonde» dissal el plevan, ma jo dut entusiasmât di duç chei bravos di prime, no fermi e i voi indenant «ninine giriti, ninine voltiti, ninine giriti cul cûl in sù» tra l’imbaraç e le vergogne des femines e el spass di gno nono Toni che se gjoldeve di gust.

Simpri in chel an, d’astât, une dì mê mari tornant a cjase cule riscjele, e ’ere stade a fen, passant vissìn dal ‘Riubâl’ e sint mularìe a cisicâ daûr des cises, e va a jodi ce ch’al sucêt: e cjate me cence bregons, insieme a tre-cuatri frutes che stavin fasinmi bevi aghe tal riul par dopo jodi ce mût che el sbrissul al pissave... «Brutes musces – e disè mê mari Catine – i sês grandates, vergognaisi, ur al contarai a vuestres maris». Mi à dât doi sclas sul cûl rût e su a cjase sul ‘Cuelàt’ cui bregons in man denant di jê che mi diseve «vergognôs, mus, purcìt di frutaçàt, âtri che predi!...»

Rivât a cjase i soi lât a platâmi tal cesso dapît dal curtîl là che mi soi serât dentri, e lì i soi restât cence rispuindi cuant che mi clamavin, fin che el nono, a ore di cene, al à capît là ch’i eri platât e mi à dit «ven a cene che jo no lasci che ti dein botes». Cussì ì ai cenât cul cjâf bas dongje di lui, mentri mê none Ane e diseve: «Cjalaiju, e puedin ben stâ insieme, doi boins capelans, tâl el nono tâl el nevôt, doi purcjnei di prime categorie» e jù litanies.

Lant a durmî mi an fat preâ a lunc e prometi di no fâ mai pui di chês robes tant mussulines, senò el cjàdalgjaul al sarès stât sigûr garantît par me.

 

Cheste storie e jè capitade cirche otant’ains indaûr e jo us è conti vuè ai 11 di novembar dal 2005 che i completi otantecinc ains, e siccome di porcaries ben pui gruesses te mê vite indai cumbinades, cumò i speti nome le zornade ormai di sigûr no tant lontane, di là a rindi cont ta chê gjaularìe che mi an prospetade in chê sere.

Eee poben! No stoi cence durmî par chel!